Chaltlang PYD

N.MIZORAM DISTRICT CONFERENCE VAWI 62-NA HMAN ZAWH A NI TA

United Pentecostal Church, N.Mizoram District Conference vawi 62-na chu Dt 1 - 4.3.2012 khan Headquarters biak inah tluang taka hman zawh a ni ta. He khawmpui neihna hmun hi Kum 16 chhung zet kohhran buai avanga kalh tawh, Dt 23.9.2011-a hawn lo ni ta kha a ni a. Khawmpui boruak a nuamin Biak in hawn thar a nih atanga District Conference vawikhat hmanna a ni bawk a, kohhran hote pawhin Pathian malsawmna tisa leh thlarauah kan dawng nasa hle.

Khawmpui hi Dt 1.3.2012 (Ningani) zanah Rev.P. Chunga, General Superintendent chuan khawmpui hlawhtling tak leh hlimawm tak, thlarau mite damna ni ngei turin hawnna a nei a, Praise & Worship Service-a hun hman chhunzawm niin he hun hi Mamit Bialtu Pastor, Rev.K.Lalduhsanga’n hneh takin a kaihruai a, boruak a zangkhaiin Zion hla mawi ropui nen hun hman chhunzawm a ni.

Dt 2.3.2012 (Zirttawp) chawhma lamah District Report ngaihthlak niin chawhnu lamah District Sunday School Department Conference neih a ni a, chuta thurel tlangpui deuh deuhte chu : -

1) District Sunday School Board-ah hian Bial Director-te an kal theih lohin Bial hruaitute atanga aiawh in tirh theihna dan siam nise. 2) Puitling leh naupang Sunday School zirlaibu hi uluk leh zuala siam tura hmalak nise. 3) Kumtawp Exam-ah hian Sunday School zirtirtute Exam ve ni leh tawh se.

Tichuan, zan lamah Revival-a hun hman chhunzawm niin Rev.RC Puia, Dinthar bialtu Pastor hnen atangin thuchah ngaihthlak a ni a, District zaipawl leh Sis.Ramtharzuali te hnen atangin zai mawi tak ngaihthlak a ni bawk.

Inrinni chawhma Dar 10:00 Conference rorel neih tan niin rorel palai an kal tha hle a. Chuta thurel tlangpuite chu :-

1) Kum 2013 District Confence chu ni 28th Feb - 3rd March-ah Bairabi bialah neih a ni ang.

2) N.Mizoram District hnuaiah District Level-in Media Cell din a ni ang.

3) District-in rawngbawlna zau zawk a neih theih nan Website siama hmalak nise.

4) District chhungah Bial Conference a ruala neih thin ni tawh se.

5) Chhiatrupna lo thleng zel tur laka him nan District chhungah a ruala tawngtaina neih nise.

6) Kohhran din lohna khuaah kohhran din vek a nih theih nana hma lak nise.

7) Ram lak beihpui thlak nise.

8) Statistic dik, fel leh rintlak tan neih a ni theih nan Local Church Board-in hma lak nise.

Rorel zawh hian General Superintendent kaihhruaina hnuaiah kum 2012 - 2013 atana District hruaitu turte thlanna neih niin Rev.C.Lalmuanpuia chu District Superintendent atan thlan a ni a, Rev.C.Lalrammuana chu District Secretary atan thlan leh niin Rev.Laltluanga chu District Treasurer atan thlan an ni bawk.

Zan lamah Revival-a hun hman chhunzawm leh niin Rev.R.Lalhawia, Superintendent, Aizawl East District hnen atangin thuchah ngaihthlak a ni a, Inkhawm ban lamah Pathian faka zaikhawmna hun hlimawm tak hman chhunzawm niin kohhran hoten Pathian thlarau malsawmna thar an dawng nasa hle a, zai boruak piah lamah zion hla mawi ropui rem boruak pawh a ropui thei hle.

Pathianni zing inkhawmah General Superintendent, Rev.P.Chunga hnen atangin thuchah ngaithlak leh niin Chhunah Rev.R.Lalrosanga, Superintendent, Lunglei District hnen atangin thuchah ngaihthlak leh a ni bawk. Zan lamah Rev.C.Lalmuanpuia, Superintendent, N.Mizoram District hnen atanga thuchah ngaithla tura kohhran hote leh TV lama lo thlir tuten kan beisei em em laiin Pathian thlarau hnathawh ropui tak avangin rawngbawltu pawhin thusawina hun a nei thei ta lova. Programme ruahmansa leh duan lawk eng emawzat tih theih lovin zan dar 11:00 atangin inkhawm hi Pathian faka zaikhawma neih chhunzawm nghal a ni.

Conference boruakin a nghawng kal zelah Thawhtanni khan District chuan Pathian hnena lawmthusawi chawimawina a nei a, hemi hunah pawh hian thlarau boruak a nuam chho leh hle a ni. Chawimawina Programme-ah hian Rev.R.Lalrosanga, Lunglei District Superintendent chu Speaker atan hman a ni a, a rawngbawlna pawh nasa takin Pathianin mal a sawm a ni. Tichuan, Kum 2012 N.Mizoram District khawmpui nuam leh hlimawm tak chu khamlo tak chungin Thawhtanni zan khan a tiak ta a. Kohhran hoten kan khamlo tlang hle niin alang. Nimahsela, Khawmpui tiak leh thinna ram a nih avangin “Mangtha, Dam takin” tia inthlah leh thin a ngai si a. Kum 2013-a Bairabi Bial-a District Conference Vawi 63-na hmang leh turin Pathian hruaina hnuaiah kan in “MANGTHA” ta rih a ni.