Aizawl City PYD JOINT FELLOWSHIP Vawi 2-na hlim taka hman zawh a ni ta

Aizawl City PYD Joint Fellowship vawi 2-na chu Dt. 20^th November 2011 Pathian chawhma, chhun leh zan khan hlim leh hlawhtling taka neih zawh a ni ta. Aizawl khawpui chhung thalaiten a huhova Lalpa fakna hun an hmanah hian Aizawl khawpui chhung atangin PYD member an kal tha hle a. Hlim leh lawm takin hun hman ho a ni.

            Pathianni chawhmaah Bro. Lallawmkima, Joint Fellowship Organising Committee chairman-in inkhawm a kaihruai a, Rev. Chhiarpuia, Hqrs. bialtu pastor in hunserh a hmang a, bial zaipawl intihsiakna neih chhunzawm niin  Bazar bial, Bawngkawn bial, Zemabawk bial, Thuampui bial leh Dinthar bial te zaipawl intihsiakah hian an tel a, hla thlan sa 1 leh zaipawl in anmahni duhzawng hla an thlan hmangin intihsiak hi neih a ni.

            Chawhnu lamah Upa K.Zohrangchhuana, Aizawl City PD Co-ordination Committee Chairman-in inkhawm a kaihruai a, Upa R.Lalhmangaihzuala, Bawngkawn, hun rei tak City PYD lo hruai tawh chuan hunserh a hmang. Chawhnu inkhawmah hian Khatla South PYD Male Voice, Bro. Alex Lalchhuankima, Bethlehem bial zaipawl, Hqrs. bial zaipawl, Chaltlang bial zaipawl leh N.Mizoram District Choir ten fakna hla mawi tak an sa a. Zemabawk Vengpui ten Short play Drama hmuhnawm tak mai an entir bawk. Tin, City PYD in kumin 2011 Thisen pek runpui a buatsaih (Blood For Jesus) a thisen pe hnem ber Bazar bial hnenah lawmman pek a ni a, lawmman hi Bro. James Thanghmingmawia (MZP President) chuan a hlan a ni.

            Tlai lamah Hqrs. Local PYD leh Church board ten ruai an buatsaih chu Fellowship-a kal ten kilhoin an tlaiin an puar hle.

Best Choir - Bazar Bial Zaipawl

            Zan lamah Evan. K.Lalhmunsanga, City PYD Treasurer chuan inkhawm a kaihruai a, Zaipawl intihsiak lawmman sem niin bial zaipawl 5 zingah Best Choir lawmman chu Bazar Bial Zaipawl ten an dawng a, Best Conductor-ah Bazar bial zaipawl conductor Bro. Malsawmdawngliana chu thlan a ni. (Ani hi kum 2010 ah Best Conductor-ah thlan a lo ni tawh bawk). Zaipawl dang zawngte Consolation prize pek an ni.

            Zan inkhawmah hian BESY Choir ten zaia rawngbawlna neiin an zai mawi hle a. Tin,. Bro. Alex Lalchhuankiman fakna hla sain Evan. Laltlanhlua Hnamte, Aizawl City PYD Co-ordination Committee Secretary in Pathian thuchah sawiin fuihna tha tak tak a sawi.
          Pathian malsawmna leh awmpuina nen Thlarau boruak a thain zai a nuam a, hlim leh lawm takin hun hman a ni. Kham lo tak chungin zan dar 9:20 velah City PYD Joint Fellowship chu tin a ni ta.