North Mizoram District Conference vawi 31-na zawhfel a ni ta.

* 2012 Confence Vairengte-ah. 2013-ah Maubawk, 2014-ah Kolasib Venglai

◄►North Mizoram District Missions Department Conference vawi 31-na chu Aizawl Tlangnuam Biak inah Dt. 28th-30th October 2011 chhung khan hlim taka hman zawh a ni ta. Inkhawmpui thupuiah hian Chanchintha famkim I  Kor 15:1-4 tih hman niin thupui then hrang hrnag hmangin mi hrang hrangin Pathian thuchah an sawi thin a ni.

Conference hi Zirtawp zan (Dt. 28/10/11) khan Rev. Zohming thanzama General Missions Secretary chuan a hawng a. Evan C.Hmingchunga Chaltlang bial Director chuan Chhanchintha famkim- Isua Pianna leh thihna tih thupuia hmangin Pathian thu tha tak a sawi. Inrinni chhun dar 10 atangin rorel inkhawm neih a ni a. Home Missions Field reports leh District Secretary & Treasurer reports ngaihthlak a ni bawk. Rorel palai hi 230 vel niin agenda 9 rel a ni. Rorel palaite tan tlai lamah ruai buatsaih nghal a ni.

Zan inkhawmah Pastor James Lawrence Joute, Assam M/F Director in Chanchintha Famkim - Isua Pathianna tih thupui hmangin thu tha tak tak a sawi a, rawngbawlna chanchin report ngaihnawm tak tak a pe bawk. Inrinni zan hian zaikhawmna hlimawm tak neih a ni. Pathianni zan inkhawmah hian Konakpur, Barak District Biak Insakna tur khawn niin Cheng sing 4 chuang hmuh a ni.

Pathianni chawhma inkhawmah Rev.C.Lalmuanpuian Chhandamna famkim - Krista phuma A awmna, tui baptisma tih hmangin Pathian thu a sawi a, Faith Promise appeal neih nghal a ni. Appeal-ah hian Cheng Nuai 4 chuang hmuh a ni. Pathianni chawhnu inkhawmah Rev. Biaksangzuala, Barak District Superintendent in Chanchintha famkim - Thlarau thianghlim baptisma tih thu hmangin thu ropui tak a sawi bawk. Zan inkhawmah hian Rev. V.L Dika Sailo in Chanchintha famkim tih hmangin Pathian thu a sawi bawk.

Inkhawmpui chhung hian zaipawl hrang leh mimal ten fakna hla sain zaia rawngbawlna an nei thin a, Pathian thlarau awmpuina leh malsawmna changin Conference chhung hian hlim taka hun hman a ni.

Conference rorelte:

1. 2012 Conference (27-29 Oct. 2012) na hmun tur - Vairengte bial 

2013- Maubawk bial

2014 - Kolasib Venglai bial

2. Home Missions Field ah bial huapa group insiam Crusade neih ni se, Home Missions Field-a miten thlarau an dawn theih nan hmalak ni se.

3. Kum 2012 chhung hian Mithar 200 aia tlem lo lakluh target insiam leh ni se.

4. Marpara hmunah Home Missions Field hawn a nih theih nan District hruaituten hma lo lain Tirhkoh tirh ni se.

5. District Missions board-ah Bial Director an theih loh thulhah bial OB te aiawhah intirh theih ni ve se (General lama kal zel tur)

6. Kum 2012 ah Tawngtai Thupui bu siam leh ni se

7. Persang leh Damdiai ah kum 2012 chhungin Biak In sak ni se.

Hmalakna kimchang leh bawhzuina chu District board kutah dah a ni. Dt. 30th October 2011 Thawhtanni dar 10 hian Hqrs Biak inah District Missions Board neih chhunzawm nghal a ni.