Aizawl City PYD Coordination Committee Thukhawm. SOCIAL WORKS DAY-AH THISEN PEK RUNPUI. Lunglei Town ten Zobawk - Mat lui inkar kawngkam tifai dawn

Dt. 16.9.2011 Zirtawpni dar 2:00 p.m khan Chanmari S.S Hall-ah Aizawl City PYD Coordination Committee meeting neih a ni a, Aizawl khawpui huamchhung Pastor bial hrang hrang 13 atangin member an kal tha thawkhat hle. 

N.E India PYD ten Vantlang tana thil tha tih ni, Social Works Day kan hman thin october ni 2 chu kumin 2011 hian Pathianni a ni a. Aizawl City PYD Coordination Committee (ACPYDCC) rorel hmasa chuan October ni 1 ah Social Works Day hi hman ni se, hemi ni hian Thisen pek runpui neih nise tiin a lo rel tawh a. Vawiina Aizawl City PYD thukhawm chuan October ni 1 Inrinni a Social Works Day hman tura Thisen pek Runpui neihna hmun atan hian Chanmari YMA hall hnuai emaw, CYMA hall, Tuikhuahtlang emaw biak ni se, a remchang zawk zawkah Civil Hospital Aizawl tan Thisen pek Runpui hi neih tur a ni ang. Thisen pek Thupui atan hian Blood For Jesus hman leh a ni bawk ang.

Social Works Day - Thisen pek Runpui hi Dt. 1.10.2011 Inrinni dar 10:30 a.m ah tan tur a ni a, hun tawite hman hmasak a ni a, Upa K. Zohrangchhuanan Chairman  & Hunserh a hmang nghal ang.

Thisen pe thei tur hi bial hrang hrangah Target siam a ni a, Aizawl City PYD Coordination committee chuan PYD member a tam thei ang he hunah hian thisen pe tura kal turin khawpui chhung PYD te a ngen a ni.

Vawiina ACPYDCC thukhawm hian Biak kalh mek hawn hunah tihfai engemaw hnatlanga puih ngai sawmna emaw a awm chuan theihtawp chhuaha puih ni se, hruaituten hriattirna tichhuak se tiin an rel bawk.

Hetih lai hian Lunglei khawpui chhung PYD te chuan Zobawk leh Matlui inkar kawngkam thinphun bul samfai leh tihfai hnatlang an nei ang. Date 4th Sept.2011 khan Venglai UPC Biakinah Kum 2011 Lunglei Town PYD Social Work Day hmandan tur ngaihtuahin Bial leh Local PYD hruaitu mi 27 an kalkawm a,  kum  2011 Social Work Day hi Lunglei Town PYD Local 21 ten Zobawk leh Matlui inkar kawngkam thinphun bul samfai leh tihfai hnatlang nei turin an rel a ni.  Social Works Day October ni 2 hi Pathianni anih avangin Ocotber ni 1 Inrinni-ah hman a ni ang. Hemi ni hian  Dawn khuaah Opening Function an hmang ang. A tul dan angin NH-54 kawng chhia leh khuar laite hnawhkhahna an nei bawk ang.