OTS GRADUATION DAY 2011 hman a ni

Dt.3.7.2011 Dar 1:30-4:00 PM hmang khan Zemabawk Vengpui Kohhran Biak inah United Pentecostal church, Aizawl East District hnuaia Bible School – OTS kum 2011 session Result puangin Graduation Day hlim takin thingpui ruai nen hman a ni a. Kohhran mipuite pawhin an hlutpuiin Biak In khat tlatin an kalkhawm a ni.

He Graduation Day inkhawm hi OTS Chairman leh Principal ni bawk, Rev. Pc. Lalnghakliana’n a kaihruai a. Rev. HL Dawngliana Bazar Sectional Pastor-in hunserh hmangin OTS Secretary Rev.K.Hrangvunga’n Result a puang ve thung a ni. Kuminah hian OTS zirlai hi mi 32 awmin, 19 te chu Distinction-ah an pass a, midang 13 te chu 1^st Division-ah an pass vek a ni. Kumin bikah hian hmeichhe zirlai pakhat a awm ve a ni.

Thusawina leh Gaduate-te Confer-na hi Rev. Dr.K.Satinvela’n a nei a, hemi rual hian Rev.R. Lalrinsanga General Superintendent, NEI UPC chuan Certificate semna a lo neih chhunzawm ve nghal a ni. Tin, Rev. R. Lalhawia Aizawl East District Superintendent leh Upa Dr.H.Lalruata ten Thupui thlan bik “OTS Hmathlir” tih leh “Bible School leh Bible zir pawimawh” tih hmangin thusawina an nei a, Zirlai aiawhin Pastor Thangchuanga (Graduate)-in thusawina hun a hmang ve bawk. Tin, 1^st Year leh 2^nd Year bikte Mark Sheet hi Rev.VL Dika Sailo-in a sem a, Graduate-te leh zirlai dangte hnena thilpek (present) hlanna te pawh neih a ni bawk. He inkhawmah hian Sis.Lalhmingmawii Zote, Sis.Lalruattluangi Khiangte leh J.Lallawmchhunga te, Zemabawk Bial PYD Zaipawl leh OTS Students’ Choir ten Fakna hla sain, Rev.Rosanga Kawlni Aizawl East District Treasurer-in lawmthu sawina a nei thung a ni.

He Oneness Theological Seminary hi kum 3 Course niin, kum tin thla 4 zir tur a ni a, kumin 2011-ah hian March ni 10, 2011 khan Admission tihfel a ni a, July 2011-ah Exam zovin, Graduation Day hi hman a ni ta a ni. Session dang chu March-June 2012-ah chhunzawm leh a ni ang.