ASC HOME NAUPANG TAN SPONSORSHIP A TIH THEIH TA:

ASC HOME NAUPANG TAN SPONSORSHIP A TIH THEIH TA: November 3, 2010-a Compassion Centre Project Committee, Aizawl-a neih chuan Kolasib-a kan Fahrah enkawlte chawm (sponsor) theih dan kawng thar a siam a. Mi pakhat chawm nan thlatin Rs 500/-PM hisapin a chawm theih ta e. Hei hi Pawl, Kohhran leh Department hminga chawm theih tura ruahman a ni a. Tunah rih chuan a mimal chawm (sponsor) bik neih a rem rih dawn lova, a chawm duhte pawhin kan chawmna (sponsorship fund) chu General Hqrs. ah emaw, ASC Home Superintendent hnenah submit mai tur a ni e. Kolasib-a kan Fahrah enkawl mekte hi Australia-a kan Kohhran ten min rawn chawm sak a ni tlangpui a, a lo do letna ang chauhin District hrang hrangah Target siam a ni bawk. Australia ram pumah hian member sangthum vel chauh an awm a, chung zingah pawh chuan Canberra-a Calvary Chapel Kohhran, member 300 vel chauhin min rawn chawm sak a ni a, chu pawh chu an neih chuang liama rawn chawm an ni lova, a theih ang anga sum tuak chawpin min rawn chawm sak a ni. Chuvangin, NE India-a kan Kohhran hote pawhin kan Fahrah chawmna hi kan vei tlan a, Australia lam rawn sponsor-na chauhah innghat mai lova, NE India kohhrante tana kan rawngbawlna tura Pathianin min pek Fahrah enkawlna/chawmna kawngah hian Kohhrante pawh kan thanharh a, tan kan lak a tul hle a ni. Tunah hian kan Home-ah hian naupang 36 leh thawktu 8 an awm mek a. Naupang zinga a te ber chu kum khat mi vel chauh a la ni. Heng kan naupangte hi nu leh pa nei tawh lo te an ni hlawm a, a thente chu ruihhlovin an nu leh pate a tihbuai avanga an enkawl theih loh te an ni bawk a. A thente chu an nausen laia an chhungten Home-a an rawn dah, an rawn kan chhunzawm tawh lem loh te an niin, chhungte an neih leh neih loh pawh hre lote an ni hlawm bawk a, Krismas nikhuate pawha hruaichhuaktu tur nei ve lote pawh an ni a, ASC Home bak ‘ka in’ tih tur nei lote an ni. Heng fahrah leh chanhaite hian hmangaihtu an mamawh a, tanpuitu Samari mitha an mamawh asin. Heng mite hian hmangaihtute hmangaihna luangliam nghakin hringnun khawvel an zawh ve mek a, i zarah beiseina nung neiin an damlai kawng chhuk chho hi an zawh ve mek a ni. Heng ho zingah pakhat tal tan hian kumtluana chawmna kan ti thei rih lo a ni pawhin, thla engemaw chen tal chawmna "Orphan Sponsorship” hi in rawn ti ve thei dawn lawm ni le? ASC HOME-A NAUPANG DAHLUH (ADMISSION) CHUNGCHANG: Kolasib-a kan Fahrah chawmna (Audrene Scism Children Home)-ah hian Fahrah naupang – 1) Nu leh pa nei lo te 2) Nu emaw pain emaw an boral san, chhungten an enkawl chhunzawm theih loh te 3) Retheihna avanga enkawl theih loh naupang te, thla 6 atanga kum 5 chin (dah (admit) theih a ni a, kum 18 an tlin thlenga enkawl theih a ni. Kum 18 an tlin tawh chuan an chhungten an la chhuak leh tur a ni a, hawna tur nei lo an nih chuan a tul angin Managing Committee-in an chungchang a ngaihtuah ang. Home-a naupang dah duhte tanah District tin Office-ah Admission Application Form lak theih a ni a, chu chu laka fill-up vek a, hriatpuina lehkha hrang hrangte tihfel vek hnuah ASC Home Superintendent hnenah submit leh phawt tur a ni a. Chumi hnuah Admit theih tur ang chite chauh admit theih a ni e.