UPCI hruaitu lian intawhkhawmna GLOBAL COUNCIL zawh fel a ni ta

Khawvel pumpuia UPCI hruaitu liante intawhkhawmna ropui ber Global Council Meeting chu ni 10-12, November.2010 khan Panama thliarkara an khawpui ber Panama City-ah zawh fel a ni ta. He Global Council-ah hian South America leh Carribbean atangin palai an kal tha hle a, Asia leh Africa atang pawhin an kal bawk a, Khawvel ram hrang hrang 131 atangin palai kalkhawmin palai zawng zawng hi 300 chuang zet an ni. He Global Council-ah hian South America region palai te an kal thahnem ber a, Spanish tawng chu hman tlanglawn ber a ni thung.

Golbal Council hi UPCI General Superintendent Rev.David K.Bernard chuan a kaihhruai a, thu pawimawh tak tak sawiho leh rel a ni. Tin, Asia region meeting te neih a ni a, Greet & Meet programme (inhmelhriattawnna hun) te hman a ni bawk. Foreign Missions Director Rev. Bruce A.Howell chuan Global Council kharna hun tawp hmangin pathian thuchah ropui tak a sawi a; "In puan chauh ni lovin, in thinlung pawtthler rawh u" tih tap chunga a sawi chuan midang rilru a hneh hle a, Sacrament leh kesil rawngbawlna neiin hun tawp an hmang a. Thlarau awmpuina nasa tak changin palaite mittui a tla nasa hle a, thlarau lamah an hlim tak zet a ni.

Global Council Executive Member atan Rev. R.Lalrinsanga, General Secretary UPC-NEI thlan a ni a. Global Council Executive member atan hian khawvel hmun hrang Block then hrang hrang a\anga thlante niin Rev.R.Lalrinsanga hi South Asia block atan a ni. Asia atangin South East Asia block atan Rev. Dr. J.R.Buaia, Myanmar Superintendent chu thlan niin Far East Asia atan Rev. Matsui, Japan chu Council Executive member atan hian thlan a ni bawk.

Global Council hi kum 5 danah neih thin a ni a, 2015-ah neih leh a ni ang, a hun leh a hmun tur erawh chu la rel fel tur a ni.. Global Council Executive Meeting erawh chu 2013 March thlaah Dubai-ah neih tur a ni ang.