INTLAWH TAWN HUN HMANG

Dt 22 & 23 hmang khan Chaltlang kohhran chu Sesawng PYD ten an tlawh. August ni 13 & 14 hmang khan Sesawng kohhrante Chaltlang PYD ten an lo han tlawh tawh a ni.

He intlawh tawnna hian tisa leh thlarauah hlawkna leh malsawmna ropui leh duhawm tak a keng tel a. Sesawng PYD ten Chaltlang kohhran an rawn tlawh tum pawh hian Thlarau lam Revival ropui tak lo thlengin tawnghriat leh tawnghriat lohte nen Pathian fakho a ni.

Inkhawm apiangin zai boruak a nuamin zaikhawm boruak pawh a nuam thin hle a ni. Inrinni zanah Evan R. Lalthakima, Chaltlang PYD President chuan inkhawm kaihruaiin Bro. P. Lalhlimpuia, Sesawng PYD President-in thu a sawi a. Pathianni zing inkhawmah Evan R. Lalthakima vekin inkhawm kaihruaiin Evan JH Lalhminghlua, Vice President, Sesawng PYD in thusawi lehin Pathianni chhun inkhawm hi Bro. David Lalremruata, Chaltlang PYD Secretary-in kaihruai thungin Bro. Ricky Lallawmzuala'n thusawina a nei a. Pathianni zanah Evan R. Lalthakima'n inkhawm kaihruaiin Evan JH Lalhminghlua'n Pathian thuchah nung takin a sawi leh bawk a ni. Pathianni zan inkhawmah phei chuan Thlarau lam ruai ropui tak kil hovin Thlarau-a khawih nawn eng emaw zat awmin Thlarau dawng thar pawh mi 3 lai an awm bawk. Zan Dar 8:50 ah thusawitu ding thei chauhin zan Dar 9:55 velin inkhawm ban a ni.

Tin, he intlawh tawnah hian Sis. Lalrintluangi, Sis. Lalmuankimi, Sis. Lalremruati, Sis. Jenny VL Lawmsangi, Sis. F. Lalremruati leh Bro. Felix Ramropuia te hnen atangin fakna hla mawi leh nung tak ngaihthlak a ni bawk.

Inkhawm ban hnuin Pathian faka zaikhawm chhunzawm a ni a. Zaikhawm boruak pawh a nuam hle. Khamlo tak chungin zanlai Dar 12:00 ah zaikhawm hi tin a ni.

 CHALTLANG PYD TEN SESAWNG KOHHRAN TLAWH

Dt 13-14.8.2022 (Inrinni leh Pathianni) hmang khan Chaltlang PYD-te chuan Sesawng kohhran an tlawh. Chaltlang PYD te hian zing Dar 8:00-ah Chaltlang chhuahsanin kawng lakah tukthuan an ei a. Dar 10:30 a.m. ah Sesawng thlengin Sesawng PYD hruaitute leh thalai member eng emaw zatin an lo hmuak a. Chawhnu Dar 12:30 atangin Outdoor Games (Volleyball) hmangin infiamna hun hlimawm tak an neih chhunzawm a ni.

Zan lamah Revival inkhawm neih niin Sis. Lalmalsawmi, Chaltlangin tanna hun a hmang a. Bro. David Lalremruata, Chaltlang PYD Secretary-in Pathian thu nung takin a sawi a. Thlarau lam hlate nen hun hman a ni.

Pathianni zing inkhawmah Sis.K.Lalmuanawmi'n tanna hun hmangin Evan.F. Lalngaihawma, PYD Adviser-in Pathian thuchah a sawi a/ Chhunah Sis. Jessy Lallawmawmi, PYD Financial Secretary-in tanna hun, nung takin a hmang a, thlarau lam hlate nen ropui taka chhunzawm a ni. Bro. Vanlalruata, Ex-PYD Vice President hnen atangin thuchah ropui tak ngaihthlak chhunzawm a ni bawk.

Zan lamah inkhawm neih chhunzawm lehin Bro. Lalremruata'n hun hmasa a hmang a. Evan R. Lalthakima, PYD President-in thuchah a sawi leh bawk.

Inkhawm chhung hian Sis. Jenny, Sesawng, Sis. Lalmuankimi leh Sis. Selina, Sesawngte, Sis. Kanan Ramchullovi, Chaltlang-te hnen atangin fakna hla mawi leh nung tak ngaihthlak thin a ni bawk.

Chaltlang PYD-te hian Sesawng kohhrante ngaihhruina thilpek, Dekchi leh Sana an hlan a ni. Chaltlang PYD-te fehchhuah Programme hi Pathianin nasa takin mal a sawm a. Zai boruak a nuamin zaikhawm pawh a nuam thei hle. Hemi hun chhung hian Thlarau Thianghlim dawng thar mi pahnih an awm a ni.

 CHALTLANG PYD IN DAMLO KAN

Dt 12.7.2022 (Thawhlehni) zan khan kan rawngbawlpui, Bro. Vanneihtluanga, S/o Bro. Lalsangzuala, Pile Cancer enkawl lai mek chu Chaltlang PYD chuan an inah kanna hun an hmang a. Hemi hunah hian President Evan R.Lalthakima chuan thu tawi sawiin kanna sumfai a hlan nghal a. Bro. Vanneihtluanga hi tisa leh thlarau damna thar a chan leh ngei theih nan tawngtai sakna thalai kalkhawm ten an nei nghal a ni.